黄子华末世财神(粤语)1

黄子华末世财神(粤语笔录)
各位观众，黄子华
首先欢迎大家黎到我第342场嘅栋笃笑，多谢大家。

咁黎到已经第三百几场喇，所以咧，就有D空位阔左出黎，其实唔系真系空位黎架，呢班人主要就系睇世界杯咧，就未训醒啊而家，一系就一齐響一个bar，去左庆祝父亲节，所以唔黎得，从来冇呢D咁嘅情况出现，我又从来未见过咧，響任何演唱会啊，或者呢类表演，有D人響上边D平价嘅飞，可以坐落黎D比较贵D嘅飞度嘅，好想见吓个情况系点嘅，但系，但系大家知道啊，根据场馆嘅条例系唔准许噶，所以我希望呢，希望大家好鬼鼠，系好似人地唔知道，人地睇唔见你，好慢好慢咁就鼠左落黎，咁好唔好啊，咁就畀20秒你地鼠落黎喇，小心安全啊真系，我负唔起呢个责任吓，我负唔起呢个责任，希望基本都包涵，因为咧，我做得舒服好多，你地又会睇得舒服好多，当坐晒D人落黎呢，你地就会发觉，哦原来都几满坐嘅咁样噶，呢个时候，大家，大家吓，希望你一边就留意啊，因为一阵间咧，可能你坐坐吓，忽然间就有个人呢就摞住张飞（票），咁你咪，让一让咯，横掂都仲有些少空位響侧边吓，就畀D有飞嘅人，一个优先权吓，咁呢个时间我就见到有D朋友就冇郁噶，咁就仲系个山顶个角落个D，大家就知道呢D咧主要就唔系黎睇show噶喇，呢D一pair pair D男女咧吓，你以为连体果D咧，主要就冇乜紧要啊佢地，随便随便吓大家，随便，好喇，安全喇嘛都，系，大家唔好等人黎带位啊，冇可能噶，所以，喇喇声啊，鬼鬼鼠鼠咁样就坐低就算喇吓，好，唔该晒各位，咁顺带提大家息call机喇，息你电话甚至你有嘅录影机啊电视机啊D嘢咧系哇，息晒佢。

好喇，我真系好高兴響我最后一场都有咁多朋友黎到捧场，所以我好想祝福一下大家，咁如果我嘅祝福，大家系觉得啱听嘅，我希望大家嗌声好，好唔好啊，好，首先，我愿繁荣稳定常与你们同在，好，黎多个，我愿金枕头嘅榴莲常与你们同在，啊你地唔怕果阵味嘅原来啊，好，我就愿阳澄湖嘅大闸蟹年年都与你们同在，都好，黎啊黎多个咧更加能够代表繁荣嘅嘢吓，我愿周启邦时常与你们同在，顶唔顺系嘛，OK，顶唔顺我就，我就愿周启邦净系常与佢位夫人同在，啊呢一对你地就会中意D，呢一对比较登对D我觉得吓，愿汪明荃常与罗家英同在，那呢一对就唔关我事，基本上系八卦嘅人先拍手噶唧，呢一对关我地事，我谂大家都中意嘅就系，愿老平常与彭定康同在，呢一个你地会最中意，我愿张浚生永远与你们同在，我觉得你地都唔明，但系我以前都唔明，即系张浚生響香港主要系做咩嘅咧吓，我而家我明喇，原来张浚生系香港主要嘅职务咧就系出席各大小舞会宴会啊，咁即系好紧要啊，
即系话咧只要张浚生一日響香港一日，香港都仲有party开，张浚生而家简直我觉得即系香港繁荣嘅指标啊，而家我讲起佢个名我就兴奋噶喇，你即系谂吓，张浚生，（配乐响）张浚生，three four 张浚生拉......
呃跳舞系我嘅弱项来啊，唔适宜跳得太多，黎多个我谂真系繁荣嘅指标，大家一定会好中意噶吓，呢个真系吓，我愿benz（奔驰汽车）常与你们同在，拿大家都拥有benz啊吓系嘛，即系唔出奇啊，大家谂吓，即系如果咧，benz代表繁荣，我地香港简直就系繁荣泛滥，所以我地系唔介意比人偷D繁荣返大陆，系唔系，而事实上咧，人地benz厂啊都唔明，点解我地香港人咁中意买benz嘅，我话比大家听点解，因为中国医术奇书本草纲目话啊，benz又名奔屎，有行气活血，最紧要，有壮阳之妙用，是故奔屎又名大奔，拿咁大家明白点解揸benzD 人行路总系牙牙吓噶，我愿大奔常与你们同在，特别与果D矜持唔敢笑嘅女士同在。

讲多个比较雅俗共赏D啊，我谂呢个大家会比较易接受D，淑女都可以接受，我愿金捞(劳力士表）常与你们同在，你地好奇怪，但我唔明白，你地觉得金捞太老土，但我觉得金捞好重要，我问你，一个人点解要戴捞呢，因为你唔戴捞，我觉得，你有乜资格话时间系宝贵噶，我嘅时间点宝贵，那你睇吓我只捞，咁啊氹氹括行一圈咁就十几皮嘢喇，平均每个钟就皮几嘢，你果D表吓，平均每个钟几多啊，几旧水，几十蚊咁啊，咁咪系咯，我点同你一齐食饭啊，大家时间观念都唔同，而事实上我觉得呢，戴金捞系一种嘅礼貌来噶，即系如果今日有边位，你系戴果D所谓天长地久表黎到睇我，我觉得呢D朋友曾经拥有就算喇，喂即系我点同kenwood(赞助商)交待啊，又话你D客好高档，连捞都冇只，即系你地戴捞黎到睇细佬，你畀面细佬，而最紧要啊，你戴捞呢系我觉得表示你个人有幽默感，你谂吓喇，劳力士，有边个靠劳力揾食嘅人可以戴得起劳力士啊？越戴劳力士就表示你个人越唔使用劳力，拿呢种就叫做幽默喇，愿幽默常与你们同在。

谂起黎香港真系好巴闭噶，大家有冇谂过吓，我地香港咁细个岛仔，而家养起左人地成只国家啊，菲律宾啊，系唔系呀，揾位朋友问个问题，D啱啱黎D朋友咧，好简单嘅问题黎噶唧，识答就唔好答喇，畀第二位答喇，到左星期日，边一度最多菲律宾人啊，即刻答，皇后像广场，揾多一个，呢位先生，好庄重嘅带住把遮，好似绅士咁咧，呢位先生，到左星期日边一度最多菲律宾人呢？两个皇后像广场，揾一位识答嘅，哇白伟琴(谐音)小姐，大家啊，大家畀D掌声，唔好企起身啊，惊抢晒镜啊吓，到左星期日，即系好似今日咁，边度最多菲律宾人啊？菲律宾啊，唔系咁容易做节目主持人啊，你估真系啊，但系我问多大家个问题，到左星期日，对菲律宾最有贡献嘅菲律宾人系边度？香港皇后广场，所以其他两位朋友，果位绅士朋友都答得啱，大家畀D掌声，系啊，我地而家香港系好多菲律宾人，好多菲佣啊，你睇吓咧你睇吓香港，有几多人生仔你知有几多菲佣，而家我地香港人生仔咧，可以冇老婆，但系一定要有菲佣，所以有好多人咧就直呈觉得，咁唔系喇，咁我同阿菲佣生番个就正啊真系，但你阿妈唔畀，因为你阿妈觉得，我请个菲佣番黎呢，唔系要黎生仔，佢大左肚我点教佢飞啊，你有冇见过D阿婆教D菲佣抹窗啊，基本上系教佢飞咁解嘅唧，你行出去抹啊，你行出去抹，十几楼喳你惊咩喳，你一路飞一路抹，啊乖孙，你幼稚园嘅老师，教你点样唱个首歌，你跟佢唱，（音乐响）in the window go outside you so stupid are you fly in the window go outside you so stupid tell me why 系畀D鼓励D小朋友，真系好犀利啊。

不过咁，我觉得吓，即系唔系在坐每一位都有金劳有大奔啊，咁啊请得起菲佣，但系我觉得依然唔可以掩盖大家作为香港人个种风彩，大家你谂吓，你平日点样安排节目就知道嘞，即系你谂吓你同你D朋友讲，喂放左工去食饭咯，我谂你D朋友会停晒落黎望住你，仲有咧，系嘛喂，食饭系一个节目来唧嘛，对我地香港人黎讲，一个节目唔系节目来架，咩先叫做节目啊，起码系晚饭宵夜直落世界杯，诸如此类，喂晚饭宵夜直落都系简写来唧喔，因为晚饭同宵夜之间起码中间要有好多空档要填满系唔系，当然亦都有D人系一晚饭完就话，不如宵夜咯咁样嘅，有D直呈一晚饭完，唔系喇直落喇，但系无论如何，我只系觉得我地香港人果D节目嘅多姿多彩咧，如果畀D西人睇到咧就会觉得，哇你地真系好耐冇玩过啊，唔攰噶咩，
攰咁所以咧呢个礼拜日咧我就唔出街玩喇，咁啊租左八只影碟系屋睇吓休息吓咁样喇，阿妈啊你记得早D叫醒我，唔系我惊到时睇唔晒啊，系嘛，真系我觉得，香港咁多好嘢点睇得得晒啊。

拿我想提醒大家一样嘢，香港之所以有今日，唔系一件必然嘅事，因为我D啊爷落黎香港，唔系一件必然嘅事，冇错，系落黎喇，我地大部份人嘅乡下都唔響香港噶，冇错我识得一个人，佢曾经话我听佢乡下就系左敦道yu wa斜对面，即系我唔知信唔信佢好，但系我就真系识过一个人佢乡下就響峨嵋金顶，有一个就響嵩山嘅少林，有一个甚至響江门（谐音：肛门）嘅中心，好笑喇，中国真系有个地方叫江门噶，你冇听过曾经有一个嘅电台卖过广告，D旅游广告啊，唔知坐D咩船，直入江门玩足七日，D笑果D人就玩过喇，系唔系乐而忘返咧，系啊，不过我觉得无论点样都好喇，的确我地大部份人嘅乡下的而且确系唔響香港噶，而香港之所以有今日就因为曾几何时，我地阿爷带住好多噶资金走左落黎，严格上黎讲呢，应该话系小部份阿爷呢就戴住劳力士走落黎，咁啊大部份呢，即系你同我阿爷就落黎做劳力士，即系话呢我地阿爷，真系其实系移民黎噶，讲得唔好听就系难民，而我地，就系难民嘅后代喇，所以今时今日我地同D越南难民讲，叫佢地扯啊走啊，系好有理由噶，因为我地黎先噶嘛，大家觉唔觉，我成日觉得，即系你话呢个世界咧，好多咩所谓国家地域分界啊咁样，系同去厕所冇乜分别噶唧，拿你谂吓你去厕所唧系咁，边个啊，有人啊，我黎先架，系唔系啊，就系呢句我黎先架，咁解噶唧嘛，所以我觉得，即系如果有咩人想世界和平，得，如果你可以习惯同人一起用一个厕所咁就得噶喇，即系以后咧要系咁，边个啊，哦你又黎啊，得得得，侧边侧边，黎呢度，哎呀唔得唔舒服唔够位啊，呢度前边，哎~~~~你得唔得？你得就世界和平喇，所以我就最惊果D成日满口话世界和平果D人呢，我去到佢屋企我一定唔用佢厕所啊，唔系用用吓佢老豆又走入黎，喂世侄坐过D啊，世界和平。

我觉得咩世界和平成日满口伟大理想啊呢D咁嘅人呢，就最信唔过，但系我地阿爷就唔同嘞，我地阿爷就好务实嘅，你谂吓，我地一大部份阿爷就系日本仔打我地嘅时候走落黎噶，喂个阵时你走落黎好容易畀人闹噶喔，人地会话你有冇搞错啊，国家正系处于存亡之秋，你竟然话带埋D钱落香港开厂，汪明荃点教我地啊，做个勇敢嘅中国人啊，而我地阿爷就会话，即系各位烈士啊，你地就做个勇敢嘅中国人喇，而我咧就会（唱）做个勇敢嘅中国难民，别去国家，赶快移民，我万众一心，那惧怕艰辛，冲出深圳。

呢个就系我地阿爷喇，而我地另外一个大部份嘅阿爷呢，就系共产党立国嘅时候走落黎，喂共产党立国嘅时候，佢唔系电视台黎噶啵，冇节目预告噶啵，佢唔会话畀大家听，各位我地八点钟呢会有大饥荒，九点钟会有文化大革命，跟住咧仲有欢乐还看今朝，而明珠930就会播出木马屠城记嘞，而跟住我地就会再播出咧经典恐怖片秋后算帐，我地当时唔知，唔系咁噶，当时我地唔知道，共产党D 节目系咁出位，相反系好多人系好睇好共产党噶，过到一个地步大家互相称呼对方做咩呢，系共产党里面，做同志，同一个志向，建立新中国，在坐咁多位有边位畀人嗌过你做同志噶，同性恋果D人就试过喇，大家知噶吓，同性恋嘅人系互相称呼对方做同志啊嘛，但系唔系个个都中意人咁嗌佢添噶啵，咩同志同志啊，闸住，我呢D咧，就系讲真感情，我呢D就系真正嘅同性恋，即系你呢D见到香肠都兴奋D呢，你呢D叫同性爱啊，同志同志，梅兰牌同志啊，但系当时，響中国大陆就唔同，真系所谓万众一心同付国运，当时響香港，甚至有D人抛下一切，走番返去大陆，做同志，建立新中国，而呢个时候，我地阿爷又表现佢另外好务实嘅一面嘞，即系各位我唔系话唔想做同志啊，个问题系，拿我有四旧水，做得同志冇理由唔摞出黎同大家分左佢咁衰仔系咪先吓，好我四旧水，分畀四个人每人有一旧水啊，而家当时大陆有八亿人，四旧水分畀八亿人每人有几多啊，啊呢位朋友好似计紧咁喔真系，四旧水分八亿人有几多啊先生，正常啊你，正常啊唔知系，呢位小姐我好少问小姐，小姐你知唔知，唔知，在坐黎得睇，我觉得系有识之士啊，系唔系，都唔知，但系我唔怪得你地，我谂呢，你叫马克思心算都死啊，而事实上马克思当时死就系因为计紧四旧水分畀八亿人有几多，计一计就瓜左，就系咁样嘅，所以我觉得你话共产主义呢D嘢咧，即系话唔话唔好，个问题系如果你国家得四个人咪几好咯，最好就系另外个三个人仲有钱过你就更加好喇，所以我地阿爷就走左落黎香港。

而香港系一个中国人嘅地方就畀D英国人统治紧啵，我地个阵时成日呢就要对住一幅唔系好靓嘅鬼婆相鞠躬敬礼，我地知道佢唔系好受得起啊，咁今时今日佢几个仔呢都戴左绿帽咁滞喇，唔系咁滞，应该系戴晒喇我谂就，但系事实上呢啖气響当时黎讲真系唔系每一个人都
忍受得住喔，但我地阿爷又唔同，我地阿爷就会话，哎，我地落黎香港系求财唧，唔系求气啊，系嘛，何况你英国真系同中国白纸黑字签晒租约租香港噶嘛，系个租约唔系几公平，但系香港嘅租约素来都系帮租客噶嘞，系唔系，我想像到，如果岳飞仲在生，佢会几咁气愤，佢会话，我地应该壮志饥餐英国肉，笑啖渴饮鬼佬血，好采啊各位，今时今日我地都唔汁输，我地香港都出现左一个香港岳飞，简炳墀，我地应该啊，壮志饥餐邓康肉，一于强奸果个女人，唔准笑啊，我系马会好有食力嘅我，咁但系，我地阿爷唔系岳飞，亦都唔系果个男人，好彩佢唔系喔，即系如果佢系呢，佢咁热血咁就死喇，可能佢根本就唔会落黎香港，咁今时今日嘅香港呢就可能仍然会系，（音乐）乜话，又要加租，喂上个月先加左六条泥孟唧喔，妖，至多唔系唔搬，阿仔，开艇，系唔系咧，梗系唔系喇，你几时響香港而家你数云晒香港几百万人都冇一个再系咁嘅样噶喇，冇噶喇，因为点解今时今日噶香港，系所谓东方之珠，亚洲小龙啊，而香港之所以有今日我地好清晰喇，就系因为我地阿爷能够乜嘢都唔理，专心揾钱。

大家谂吓你细个，由细到大你阿爷点样训练你呢，一到左新年第一句同人讲嘅系乜嘢，你地移民移得耐左唔记得左啊，恭喜发财，第二句呢，身体健康，一定要讲身体健康，因为身体唔健康点发财啊，不过大家要搞清楚，呢个系辅助性质来噶唧身体健康，千奇唔好啊我恭祝你净系身体健康，净系身体健康好节堕啊，乜嘢都要发财，最好你就恭祝人，啊我恭祝你今年呢生意兴隆一本万利货如轮转富贵吉祥大吉大利花开富贵，花开左应该谢架，点解会富贵呢，因为谢都要谢得富贵啊嘛，你间唔中仲可以加句咩龙马精神啊万事如意啊，但系点及得无论好丑横财就手咁妙啊，而我地我觉得，我地身为我地阿爷嘅子孙，在坐咁多位，今时今日已经能够将呢个揾钱大晒嘅观念发展到前人未到到达过嘅高峰，大家知唔知道旧年最流行最新最杀食嘅一句贺词系乜0嘢野，OK有奖品，踊跃D，有奖品都唔识答，咁我话畀大家听，我恭祝大家，不劳而获啊，有冇听过啊旧年，哇即系几兴奋啊畀人赞，恭祝你不劳而获，你即系谂吓，发财梗系好喇，但系发财都要有个方法架，有咩方法好得过不劳而获呢，不劳而获嘅发财方法就系唔使方法，唔使方法就系最好嘅方法喇，我觉得我地想发财已经想到一个禅嘅境界啊，即系来紧呢年如果有人话你非奸即盗即系赞你勇敢，话你蛇鼠一窝即系赞你合群啊，哇乜你个家庭咁犀利架吓，蛇鼠一窝非奸即盗，梗系喇，唔系点样可以冚家富贵啊，真系无论由历史嘅角度，文化嘅角度，香港嘅存在只有一个目的啊各位，就系畀我地響度发财，如果我地響度唔发财，我觉得我地对唔住我地阿爷，又更加对唔住香港，咁香港就会惩~罚~你~
你有冇谂过，如果香港咁好，点解我地仲有深水埠，深水埠就系要黎惩罚果D唔发财嘅人，我住过響深水埠，好恐怖，我仲记得我个阵时住果个地方嘅厕所，就正等于其他大部份深水埠嘅住宅厕所一样系度身定做嘅，即系你有几大个佢就有几大个，即系变左好多时你浪口洗面刷牙，乜嘢都系響个笪地方，于是好多时好奇妙嘅事情就会发生啊，有时你会冲完凉，系唔系，你行返出黎忽然间会发觉，咦，点解我仲急嘅，哦原来原本我系想入去屙屎架，有时你又会刷完牙忽然间发觉，咦，点解会冇左半卷厕纸嘅，你屙完尿会发觉，点解我全身会冇着衫架，点解，唔知，好悦耳，好恐怖，而最恐怖嘅就系有时你有D朋友会黎探你，就会用你嘅厕所，用完之后佢地都会響个厕所度写低D，阿珍生疱疹，你会唔明点解，你就捉住个朋友问你做乜鬼你做乜鬼嘢，个朋友就会话，我头先用用吓你个厕所，忽然间觉得自己好似響公厕咁，于是就写左呢D嘢嘞，厕所好恐怖，好多时我唔够胆用，我情愿落去借用人地茶餐厅D厕所，但系我唔会食佢地D嘢，唔敢食，太平啊，十八蚊咁大块牛扒，你D咩牛黎架，咁平嘅，有腮架，钓返黎架，话唔定果D唔系牛肉，个D可能系老鼠肉黎噶啵，有冇咁大只老鼠，深水埠成日有好多老鼠返唔到屋企架你地知唔知啊，唔知点解，因为太肥迫唔返入个窿度，你下次返唔到屋企不妨同你老婆用呢个理由解释啊，老婆今日我返唔到黎，肥左啊。

系啊真系深水埠真系有好多好奇怪记录，譬如讲叫鸡啊，特平，即系平到你唔信，如果你将你系大富豪一晚所用嘅钱，一晚之内用晒系深水埠身上咧，我包你即刻有人揾你拍广告扮张德培啊，一齐黎用杜雷斯campaign啊，啊唔系，一齐黎用杜雷斯，头皮no way，仲有
得讲价添你知嘛，百五蚊，一个月啊，你畀我咩百五蚊，算了算了唔玩，真系百五蚊，拿包抹车啊，我知道你点谂嘅，你可能觉得哇，有冇咁夸张啊，ok你唔好信我，大家唔好信我，你信在坐住響深水埠果D人，你问一问佢，拿有边个住響深水埠，你拍一拍手，有两三位，真系咁高档我D顾客，呢D咁嘅贵飞冇人买嘅，高档得咁紧要真系，坦白D喇有边位系唧，拍拍手有乜所谓唧，我都系深水埠出黎噶唧嘛，拍一拍手掌，好嘢好嘢，大家认住呢D人啊，跟住我想讲嘅呢就系，唔知点解系深水埠呢系冇靓人噶，望真D，头先拍手果D，间唔中有一个靓噶系搭车经过噶唧，真系你连，就咁讲乞衣先算喇吓，深水埠D乞衣劲过出边D好多架，即系全香港最高大最结实最有型个髻呢就系深水埠啊，你唔觉意呢你行街你以为佢咩(背)住个仔啊，大家知唔知点解佢个髻咁劲呢，因为佢地用左只gel，果只gel就叫做without深水。

但系我觉得咁都唔系最惨，而最惨真系比较哀伤果D啊，就系住響深水埠嘅人，大部份呢，都系患左绝症噶，因为住響深水埠大部份人佢嘅银行存折呢只系得四位数字噶唧，我点知，喂你成日去揿机，又未轮到你，你做咩啊，大家都做喇你又唔使讲，好嘞四位数字我问你喇，四位数字你食得几耐啊，而家咁嘅物价指数，一个月？两个月？咁咪系咯，你同一个患左绝症嘅人有咩分别唧，都系得一两个月命噶唧嘛，我成日觉得呢D人可以申请，即系好似我地咁样啊四位数字，咪申请入医院咯，得架嘞，姑娘问你咩病啊，我有左四位数字啊，所以D人话，咩吸烟危害健康，吸烟梗系危害健康喇，一包烟廿几皮，食得十零包冇左几旧水，唔危害健康，所以其实睇戏又危害健康，卡拉OK又危害健康，shopping啊，唔好喇，致癌啊，旧年shop 左一次差D过唔到年，乜嘢唔危害健康啊，揿机嘞，呢D系我地四位数字嘅人，最大嘅娱乐黎架，每个月一过左二十号呢，我地一定要每日揿几次机先至安乐噶，今晚打牌，唔打喇我约左人揿机，真系如果你去到就算唔系自己揿，睇人揿都快乐架，好睇过睇人打机架，啊二十号唧啵，你就揿到出粮喇，可唔可以教我点揿啊。

当然我唔希望大家错觉，讲到呢度，似乎住系深水埠嘅人呢好似好绝望咁，唔系，因为香港政府系好有良心架，每当我地最绝望嘅时候，佢就畀我地听一首音乐，呢首音乐能够起死回生，救赎万民，（音乐）听唔听得出系咩音乐，又有奖品，就好似呢位先生讲，呢个就系伟大嘅六合彩，一阵间黎摞奖品，OK，就有六合彩废票四张，喂六合彩废票好接近架果次我都真系，大家觉唔觉得，一听呢首音乐咧，即刻充满希望觉唔觉啊，充满晒希望系嘛，你听呢首音乐你就知道全香港最动听嘅声音唔系@#$#%^$(唔知系乜)，个个都同佢倾过偈定喇呢度，一听呢首音乐你就知道全香港最受欢迎果把声音其实系Mr.六合彩，夏春秋先生，the first strong number tonight is number 32，阿爸果D英文好似唔系好准咁唧喔，你理得佢英文准唔准啊，佢开D number准就 allright喇，我个人真系好鬼中意夏春秋，个阵时我成日同夏春秋祈祷，夏春秋，如果你畀我中六合彩，我愿意娶阿吴君如，不过后来吴君如红左，又瘦左又靓左，我又同夏春秋祈祷，夏春秋如果你唔畀我中六合彩，你咪畀我娶吴君如咯，但系后来吴君如红左呢，夏春秋唔使做啊，跟住冇做六合彩咯，但系夏春秋冇做喔，六合彩仲继续喔，我觉得咁啊真系证明左香港真系一个法治唔系人治嘅地方，愿六合彩常与你们同在。

你谂起黎，系唔系真系抵先，喂而家六合彩几钱一注啊各位，四皮系嘛，四皮一注，四皮就买一个希望啊，你去全世界格吓有边个希望系平得过四皮，我地香港有个叫咩希望工程，三百蚊就供个细路读一年书买个希望，唔系一年好似几年嘅买个希望咁样吓，好喇喂，三百蚊先至买一个希望，仲唔系批发价啵，我三百蚊可以买75个六合彩希望啊，而当你有75个希望嘅时候，你就知道点止希望咁简单，任何对六合彩有诚意嘅人，你都试过噶，到左金多宝，你摞住三旧水，畀一沓我，你摞住果一沓纸啊，你训唔着啊果晚，你开始好紧张，你不断想安慰自己，唔好咁紧张，希望黎唧，但系75个希望喔，于是开始你慢慢控制唔到自己D 思想，你开始，唔系喇，买趸楼先，买趸楼太扬，千奇唔好买趸楼，乜嘢都唔好买，好似咩事都冇发生咁，继续返工，唔好迟唔好畀人知道啊，咁中六合彩黎做咩呢？唔得，起码一定要买部，系买部Porsche（保时捷），系鸭寮街掟个靓弯先，然后系部Porsche度哏个头出黎，阿婶D橙点卖啊，哇型死啊真系，后日，后日老豆就大寿啊，唔好一次过畀太多钱佢使，畀住五万银佢使住先，老豆下年就十万再下年就十五万，即系我就预左一半彩金出黎架喇，你有本事咪摞晒先走咯，摞唔晒正衰仔，冇仔送终啊，唔讲得笑咩两仔爷，尤其我有左钱而家，但系如果我有咩三长两短，唔系喇，立遗嘱，将大部份嘅钱呢就畀屋企人，少部份，我忽然间明白，我知道咩叫做少年得志啊各位，咩叫少年得志呢就系你好似我咁后生就可以立遗嘱，即系你好似我咁后生就可以同你老豆讲，阿爸，你唔好激我啊，唔系我唔分畀你架，呢D就真系叫做成就喇我觉得，唉但可惜我成就黎得太迟，如果早D黎呢我就唔会丧失左果个机会。