粤语正字

第一课 介绍

会话
A：阿波，你好！

B：符先生，你好！我嚟介绍一吓，呢位系新同学。

A：小姐，点称呼你呀？

C：我姓李，我叫李安娜。先生，贵姓呀？

A：我姓符，我系老师。

C：符老师，好高兴识得你。请问符老师系粤语老师吗？

A：系。

C：符老师，以后多多指教。

A：唔使客气。

B、C：符老师，再见！

A：再见！

课文：
我嚟介绍一下自己先，我叫余波，系英国人。呢位小姐叫李安娜，系美国人。我哋嚟广州学粤语。符先生系粤语老师，佢系广州人。




第二课 问候

会话
A：玛丽，早晨!

B：早晨！吴先生，食咗饭未呀？

A：食咗喇。你几好吗？

B：几好！多谢吴先生关心。

A：学习忙吗：

B：呢排好忙。

A：注意休息呀！

B：唔紧要，你有心。

A：系呢，我哋听日去深圳，你去吗？

B：唔去喇，我唔得闲。

A：做功课呀？

B：系呀。

课文：
吴先生系老师，佢教粤语。佢好关心我哋。我哋呢排好忙，吴老师听日去深圳，我哋唔去，我哋做功课。




第三课 问路

会话
A：请问，永群百货公司点行呀？

B：对唔住，我系外地人，唔系几清楚。

A：唔该，永群百货公司点行呀？

C：一直行，过一个路口啦。

A：嗰度远唔远呀？

C：唔远。

A：呢条系乜嘢路呀？

C：呢条系云桂路。

A：呢度有冇洗手间呀？

C：有，转左手便啦，嗰处有洗手间

A：好，唔该晒！

课文：
我系英国人，嚟广州学粤语，唔系几识路，我问东方宾馆点行，远唔远，李小姐话一直行，过马路，转右手便，嗰条马路叫流化路，好易揾。




第四课 喺银行

会话

A:小姐，我换钱。

B:换乜嘢钱？

A:美金换人民币。

B:换几多呀？

A:一百蚊。今日兑换率系几多呀？

B:五四算，嗱，五百四十蚊人民币，你点吓啦。

A:啱喇。小姐，我想喺呢度存啲港纸。利息系几多呢？

B::嗰度有利率表，你睇吓啦。

A:噉，存六个月定期啦，嗱，呢度系五千蚊港纸。

B:你填存款单啦。

A:好，唔该！


课文：
呢处买嘢唔使外币，我去银行换银纸，一百美金换五百四十蚊人民币。我喺呢间银行存咗钱，存六个月定期。活期利息低，定期利息高。




第五课 买嘢

A:你买乜嘢呀？

B:唔该畀嗰个手袋我睇吓，几多钱呀？

A:四十蚊

B:请问有冇细啲架？

A：对唔住，冇嘞。

B：几时有呀？

A:下星期三啦。

B:唔该，呢对皮鞋点卖呀？

A:九十三蚊，你着几码鞋呀？

B:三十七，有冇灰色架？

A:冇。

B:可唔可以试吓？

A:可以。


课文：
星期日，我去街。百

货公司好热闹。呢件旗袍好靓，百七蚊一件，唔系几贵。嗰对皮靴系新款，价钱好平，晒士大过头，唔啱我。




第六课 约会

A:安妮小姐，你今晚得唔得闲呀？

B:得闲。有乜嘢事呢？

A:我请你睇戏，好唔好呀？

B:好，多谢你先。睇乜嘢戏呀？

A:英国片《远洋探险》。

B:喺边度睇呀？

A:喺假日酒店嘅蓝宝石电影院。

B:我唔系几识路架。

A:唔使担心，你喺宿舍等，我五点钟揾你。

B:好，五点钟见！


课文：
今晚安妮有约，阿俊请佢睇戏，喺蓝宝石电影院睇《远洋探险》，呢出系英国片。




第七课 食海鲜

会话
A:先生几位呀？

B:两位。琼斯小姐，你中意食乜嘢呀？

A:邓先生，我唔系几识点菜架，你嚟啦！

B:呢间酒家嘅海鲜唔错架。

C:噉，食海鲜啦。

B:要呢几样啦：白灼虾、清蒸桂鱼，仲要……。

C:够喇，够喇，食完先啦！

B:点呀？

C:呢度嘅海鲜真系好味道噃。

C:嚟个扬州炒饭添啦。

B:小姐，唔该埋单！

C:邓先生，多谢晒喇，今晚我好开心。

课文：
邓先生请琼斯小姐食海鲜，嗰间酒家嘅海鲜好有名架。琼斯小姐好中意食白灼虾、清蒸桂鱼，仲食咗扬州炒饭添。佢哋好开心。




第八课 搭车

会话
A:你好！叶先生，你又系搭十四号车呀？

B:系呀，杰丽小姐，你去边度呀？

A:我去火车站，接一个朋友。

B:你搭错车喇，呢架车唔去火车站架，你要转车。

A:喺边度转车呀？

B:喺北京路转七号车啦，到总站落车。

A:叶先生，我想问吓你我今晚入石牌，喺火车站搭乜嘢车呀？

B:搭三十三号车啦，总站喺火车站。

A:噉，好方便?。叶先生，唔该晒你！

B:杰丽小姐，北京路到喇，你要落车喇。

A:有慢，唔该借借！


课文：
广州系个大城市，巴士、电车、的士好多，去街好方便。杰丽去火车站，搭十四号巴士，喺北京路落车，转七号巴士。佢同朋友今晚入石牌，喺火车站坐三十三号车。



第九课 打电话

会话
A:喂?你呢度系唔系7766312呀？

B:唔系，你打错电话喇。

A:对唔住，打搅晒。喂？请问你系7766312吗？

C:系呀，你揾边个呀？

A:唔该揾石先生听电话。

C:我哋呢度有两位石先生噃，你揾边位呢？

A:我揾石业辉先生。

B:佢啱啱行开咗。

A：噉，郭小姐喺度吗？

C:你等一阵啦。

D:喂，边嗰呀？我系郭小姐。

A:郭小姐，你好！我系麦克呀。

D:你好呀，麦克先生！

A:石生返嚟，请佢畀电话我。


课文：
麦克畀电话石先生，想约佢今晚六点四个字喺餐馆外便等。石先生唔喺度，麦克留低电话号码，请石先生复电话畀佢。




第十课

中国人嘅姓

会话
A:请问贵姓

B:我姓王，三画王。

A:三画王？点解你嘅姓咁长嘅？

B:冇吖……哦，广州话王、黄读音唔分吖嘛。我写畀你睇啦。

A：系唔系一个读音两个姓解呀？

B:冇错嘞。嗱，王，拆开嚟讲系三画王

A:[指“黄”字]呢个呢？

B:叫江夏黄。

A:好有意思噃。

B:中国人嘅姓好复杂架。

A:点复杂法？讲啲嚟听听。

B：首先嚟讲，中国人嘅姓太多。通常讲有百家姓，其实唔止一百个嘅。

A:噉总共有几百个呀？

B:单姓五百几，复姓六十零。

A:乜嘢叫单姓、复姓嚟架？

B:单姓就系嗰个字。譬如讲，姓张呀，姓陈呀，姓李呀……

A:复姓系两个字，系唔系？

B:啱嘞，譬如讲，欧阳呀，司徒呀，等等。

A:哗，咁多点记呀？

B:唔使点记嘅。记住嗰啲常见嘅就得嘞。

A:张呀，陈呀，李呀，嗰啲咯噃。

B：喺啰。另外，中国人嘅姓里头，同音字唔少架。

A:好似头先讲嘅王、黄噉呀？

B:系嘞。所以，姓张嘅，自我介绍嗰阵，有时就加多一句“弓长张”

A:噉姓陈嘅呢？

B:耳东陈。

A:姓李就系木子李喇。

B:冇错。你学得好快噃。


课文：
中国人嘅姓好有意思。分单姓、复姓。单姓五百几个复姓六十几个。冇法子记得晒架。一般记住常见嘅十零个就得嘞。

仲有，中国人嘅姓有时会系同音字。遇到噉嘅情况，就要拆开嚟讲。

譬如三画王、江夏黄、弓长张、耳东陈、木子李等等，唔系人哋会“张冠李戴”架。





第十一课 喺邮电局

会话
A:朱丽小姐，咁啱嘅，嚟寄信呀？

B:系呀，我寄信去上海同埋去美国。

A:上海嘅信寄航空啦，平信好慢架。

B:美国嘅信要贴几多钱邮票至啱呢？

A:你畀入便嗰个小姐秤吓啦，我估要两个半银钱啦。

B:要几耐先至到呀？

A:两个礼拜啦。

B:咁慢呀，我寄畀我妈咪架，有紧要事。

A:你想快啲，寄速递啦，速递快过航空信，三日就到美国嘞。

B:我干脆打电话返美国算喇。

A:梗系电话至快啦，不过贵啲。

B:喺边度有国际长途电话打呢？

A:嗰边就有，你买张电话单先啦。

B:唔该晒。

课文：
朱丽小姐嚟到邮局，佢要寄两封信，一封寄上海嘅朋友，国内航空信两毫半子，平信两毫子，航空信快啲。

仲有一封寄畀妈咪，佢妈咪喺美国，佢有紧要事。美国嘅航空信要两个礼拜至到，平信仲慢。

寄国际速递快过寄航空信，三日就到美国。打电话至快，喺邮局打电话好方便，嗰度有国际长途直拨电话。朱丽后尾决定打电话。





第十二课 睇医生

会话
A:你觉得点呀？边度唔舒服呀？

B:我琴晚黑就开始喉咙痛，而家成身都痛。

A:有冇发烧呀？

B:啱先姑娘同我探过热，三十九度七。

A:擘大口，睇吓你嘅喉咙。

B:我个肚有啲痛，消化唔系几好。

A:肚痛有几耐喇？

B:前日就开始喇，医生，我使唔使打针呀？

A:唔使，食住啲药先啦。

B:我嘅病紧唔紧要呀？

A:唔紧要，系感冒啫，好快会好番嘅。呢两日唔好上堂，休息吓啦。

B:医生，我想问下，喺边度攞药呀？

A：喺二楼，订价处、交费处同埋药房都喺嗰度。

B:唔该晒!


课文：
我琴晚黑觉得好唔好舒服，喉咙好痛，今朝早起身头痛，发高烧，成身冇力，仲肚痛添。

我去医院睇医生。入到诊室，护士就同我探热。医生系位女士，戴住副眼镜，态度好好。

佢开咗药片同药水畀我，都系一日三次，药片一次四粒，药水一次一格。

我仲要打针添，注射室就喺隔篱。我嘅病唔紧要，系感冒。我返学校请病假，呢两日我唔上堂，喺宿舍休息。





第十三课 天气

会话
A:听日系礼拜，我同埋你上白云山玩咧?

B:呢排天气咁差，话唔定听日落雨噃。

A：唔会啩？今朝早热头咁猛。

B:而家个天又阴番喇。

A:成日落雨，周围湿 ，好唔舒服。

B:呢排个天系噉架，呢啲雨仲要落一个月度啦。

A:广州嘅春天咁暖，热天系唔系好热呀？

B：热天梗系热啦，到咗十月仲好热架。

A:几时至开始凉呀？

B:十一月左右啦。冷天唔系几冻，春节最冻喇。

A:广州嘅天气好潮湿，我而家仲唔系几习惯。

B:唔紧要，时间耐啲，你会习惯嘅。


课文：
奥利想喺星期日去白云山，张明怕落雨，唔想去。

广州春天嘅天气时时变化，朝头早出热头，晏昼又阴番，话唔埋晚黑落暴雨，出街要带把遮。

热天会好热，最热系八月，有时会热到三十七度以上。十月系秋天喇，天气会凉爽啲，好少落雨。

冷天唔系几冻，又唔系会落雪。一年四季都有花开，奥利啱啱嚟广州，唔系几习惯广州嘅天气，时间耐啲佢会习惯嘅。






第十四课 学习生活

会话

B：等一阵先，我想做完功课至去，仲有一条题啫。

A:我哋系唔系星期五考粤语呀？

B:系，你开始温习未呀？

A:开始喇。你话学粤语容易抑或学普通话容易呢？

B:学普通话容易过学粤语。粤语嗰啲声调好难读准嘅。

A：我上次测验啱啱合格，你呢？

B:好过你哋啦，七十分。我时时听粤语广播同录音，听多啲，讲多啲，进步就快啲。

A：你有冇粤语拼音嘅录音带呀？

B:有呀。

A:不如你借畀我听两日，得唔得？

B:得，饼带就挤喺书架上便，你返转头嚟攞啦。

A：多谢晒，我去球场先喇。

B:好，一阵见。

课文：
呢个星期五第

一课考粤语。彼得同其他同学已经开始温习功课。学识粤语唔容易，特别系嗰啲声调，好难读准。

彼得好勤力，时时听粤语广播同录音，进步好快，上次测验成绩几好。

亨利啱啱合格，差啲肥佬。佢借咗彼得嘅粤语拼音录音带，准备认真练吓发音，佢哋嘅生活又紧张又有意思。

上昼上堂，下昼去图书馆，或者语音室。有时去打波。周末去俱乐部，俱乐部有电影室、健身房，仲有卡拉OK






第十五课 康乐活动

会话
A:早晨，安妮！咁早去跑步呀？

B:系呀，阿强，你又咁早嘅？
A：我朝朝早都练拳嘅。

B:我好想跟你学吓打拳，你几点钟开始练架？

A:六点钟练到七点钟度，你听朝就嚟啦。

B:好，我听朝一于嚟。系呢，阿强，呢个星期学生会组织几场比赛噃，你参加边样呀？

A:我参加足球赛。我小学就开始踢波喇。安妮，你打桥牌水平唔错，报名参加桥牌赛啦。

B:我报咗名喇，星期三就开始比赛。

A:今晚俱乐部有个舞会，你去唔去呀？

B:唔去喇，我去约咗朋友去听音乐，你呢？

A:电视台转播省港杯足球赛，我系球迷，梗系睇电视啦。


课文：
每日朝头早，校园人便好热闹，好多人喺度锻炼身体。

安妮一早起身跑步，佢见到阿强喺礼堂前便练拳，安妮对拳术好感兴趣，想跟佢学拳。

阿强自细中意踢波，佢系系队员，准备参加系际足球赛。

学校除咗举行足球篮、排球、乒乓球嘅赛事之外，仲有中国象棋、桥牌、游水嘅比赛。安妮系桥牌好手，佢报咗名参加桥牌比赛。




第十六课 拜访老师

会话
A:汉森，你好耐冇嚟喇，请坐啦。

B:陈老师，我琴日嚟过一次喇，你唔喺度。

A:我琴日有事。真系唔好意思，要你行多咗一次。

B:唔好咁讲，我系一直想嚟探吓你同师母嘅

A:你想饮啲乜嘢呀？咖啡定系茶？

B:陈老师，冲杯茶得喇，唔该。啲茶好香??，系乜嘢茶呀？

A:铁观音，系朋友送畀我嘅。而家你嘅粤语，讲得几好喇，你呢次考试考得点呀？

B:麻麻哋啦。过两日放假，我哋想去旅游。

A:学习咁紧张，考完试，应该去玩吓。你哋想去边度旅游吖？

B:都未谂定。

A:汉森，今晚喺度食餐便饭啦。

B：陈老师，千祈唔好客气，我仲有啲事。

A:咁好啦。得闲再嚟坐啦。


课文：
汉森考完试，去陈老师屋企坐。陈老师同埋陈师母热情咁招呼佢，冲咗好香嘅铁观音添。

倾咗一阵偈，师母一定要汉森留喺度食晚饭，佢炒咗几味广东菜，汉森都好中意食。

陈老师同学生嘅关系好唔错，汉森同其它同学时不时去陈老师屋企坐。

陈师母系中学老师，佢哋有一个仔，一个女，都读紧大学

。陈老师嘅屋企有好多书，布置得整洁舒适。







第十七课 游丹霞山

会话
A:叶生，加油呀！差唔多到山顶架喇！

B:唔使咁急，慢慢上，睇真啲周围嘅风景先。

A:丹霞山唔系十分高啫。叶生，喺呢处映番张相，好唔好？

B:好，揾人揸相机，帮我哋两个映啦！

A:我哋呢次除咗爬丹霞山，仲去边度呀？

B:一阵落山跟住坐车去南华寺，嗰度好多嘢睇架。

A:我好早就听讲过南华寺喇。我同安妮净系去过广州嘅光孝寺啫。

B:广州仲有唔少名胜古迹，第日我带你哋去啦。

A:好呀，一言为定。

课文：
学校放假，亨利同埋叶生一齐去粤北丹霞山旅游，嗰日啱啱落过雨，空气特别新鲜。

佢哋从山脚一直向上行，亨利行得快，叶生叫亨利行慢啲，欣赏一吓周围嘅风景。

佢哋喺山上便映咗好多相。由山上望落去，啲景色好靓，好似幅油画噉。

佢哋落咗山，跟住坐巴士去南华寺参观。平时，亨利同埋啲同学好中意游览广州嘅名胜古迹。

佢哋去过光孝寺，陈家祠六榕花塔，仲去过南越王墓添。






第十八课 过节

会话
A:格林，寒假快趣到喇，你想去边度玩呀？

B:我准备喺广州过寒假。听讲广州嘅春节零舍热闹，我想睇吓广州人点样过年。

A:广州嘅春节热闹过元旦。好多人忙咗成年，就趁住春节嗰几日同家人团聚，去亲友度拜年。

B:到时我揾埋班同学去老师屋企坐吓，拜个年。李生，听讲“迎春花市”好有情趣，系唔系呀？

A:冇错，“行花街”系广州人过春节最有特色嘅活动。啲人好兴去花市买花。

B:李生，你话我知，行花街系几时到几时呀？

A:由年廿七到年卅晚，日头同晚黑都可以去。

B:唔少家庭摆盆桔喺屋企，系乜嘢意思呀？

A:喺粤语入便，“桔”同“吉”同音，买桔就系攞意头，“吉利”嘅意思。

B:哦，原来系噉嘅。到时我都买番盆桔返嚟摆吓至得。

A:旧时一到过年，家家都炸油角。而家少咗喇。街上便有好多年货卖，买啲糖果、瓜子招呼人客，好方便，费事炸油角喇。

B：噉，过年见面，一般讲啲乜嘢吉利嘅说话呢？

A：“新年好”，“万事胜意”，“恭喜发财”，“健康长寿”。


课文：
中国有唔少嘅传统节日，最重要嘅节日系春节。喺春节前几日，广州人好兴行花街。

春节嗰几日，大家都去亲戚朋友处拜年。四月份有清明节，好多人家都去拜山。

五月初五系端午节，啲人习惯食粽，仲举行扒龙船比赛添。

旧历八月十五，就到咗中秋节喇，嗰晚大家食月饼赏月，好有情趣。

到年底冬至，唔少家庭都有过冬嘅风俗，一家人围埋一齐，食番餐团圆饭。

第十九课 去香港度周末

会话
A:行李执掂未呀？好行啰噃，唔系一阵赶唔切架。

B:赶得切。离开船仲有个几钟头。呢次去香港只得两日，真系唔知去边度玩至啱。

A：喺香港嘅南面，有好多巴士去架。香港最古老嘅渔村就喺嗰度。而家嘅赤柱大街就好似一个好大嘅超级市场噉，都系啲铺贴。如果你周末去呀，唔知几逼人添。

B:九龙又有乜嘢睇呢？

A:晚头黑梗系要去油麻地嘅庙街啦。

B:呀，系?。安妮嗰只中文字嘅手表，佢话就系嗰度买嘅。

A：嗰度乜嘢都买得到。系喇，我仲有个建议添。

B:乜嘢建议呀？

A:新界嘅西贡，或者离岛嘅长洲、大屿山，如果你时间够嘅话，可以去行吓呀

B:唔知时间紧唔紧呢，因为我星期一要赶返嚟上堂架。

A:我只不过话你知啫。你呢次唔够时间，可以下一次至玩架。

B:噉梗系啦。好，行李执掂晒，行得。

A:再见！祝你玩得高兴。

课文：
科尔第一次去香港度周末，星期五晚黑搭船去，星期一朝早要赶返嚟上堂。

王先生介绍佢坐缆车上扯旗山山顶，欣赏吓港九全景。跟住可以去赤柱。

嗰度系香港最古老嘅渔村，而家集中咗好几十间铺头，成条街就好似间大嘅超级市场噉。

晚黑返番嚟九龙呢便，去吓庙街睇夜市。安妮同佢讲过。嗰度有啲手表系有中文字嘅，第二度揾唔到嘅?

当然，香港仲有唔少地方值得去去嘅。譬如讲，新界嘅西贡离岛嘅长洲、大屿山等等。

科尔呢次周末唔够时间玩，下次再去过。







第二十课 外来词

会话
A:喂，你去咗香港一趟，有乜嘢体会呀？

B:广州同香港好唔同嘅。

A:点唔同法呢？

B:譬如讲，广州话同香港话就有啲唔同。

A:系咩？

B:香港话里头有好多外来词。

A：噉又系。香港旧时系英国殖民地，嗰度啲广州话吸收唔少英文嘅词语。

B:我开始都唔系几习惯，听得两听先明白人啲讲乜嘢。

A:你讲啲来听吓。

B:好似个“士”字噉。凡系英文读S 音嘅，佢哋都用“士”代替。

A:广州话够有咯。乜嘢巴士，的士、波士呀，仲有士的呀，噉喇

B:我喺香港撞到一单好趣怪嘅畸士。我同啲朋友锄大D嗰阵发现多咗张烟士。

A:点一模一样法呀？

B:都系士担式嘅图案。你见过未呀？

A:真系未见过?。

B:系喇，差啲记得添。我喺香港买咗啲芝士畀你架。你得闲嚟攞吖。

课文：
香港话里头有好多外来词。原因好简单：香港旧时系英国殖民地。

嗰度啲广州话吸收咗唔少嘅英文词语，好似个“士”字噉。凡系英文读“S”音嘅，香港话都读成士字。

巴士、的士、波士唔在讲，呢啲喺广州话里头都用。

特别啲嘅系畸士、烟

士、芝士啦，仲有就系士啤、士多、士担等等喇。呢啲香港话先用嘅。






第21课

课文 五羊城嘅传说之一

麦克嚟到广州冇几耐啫，就发觉广州唔净只得一个名嘅?，仲有羊城呀，穗城呀，花城呀噉。花诚呢个名就好理解吖广州一年四季都有花开吖嘛。之但系羊城、穗城同广州又有乜嘢拏能呢？麦克谂极都唔明于是佢去问陈老师：你可唔可以话我知点解呀？陈老师话：可以。广州叫做羊城、穗城系有段古架。

相传喺两千几年前，有一日，个天忽然金光闪闪，冇几耐就见到五个仙人，一个骑住羊，脚底踩住彩云慢慢噉飘落嚟，其中有一个仲系女仙人添，头发长长。佢哋着住五颜六色嘅衫，每人揸住一扎稻穗，嗰五只羊口入便都但住稻穗。仙人落地之后，就将稻穗送畀当地嘅人民，仲话：祝愿呢座城市永远冇饥荒。讲完，仙人踩住云飞走喇。讲嚟又怪，嗰五只羊又唔跟埋走，慢慢噉变咗石头。广州人为咗纪念仙人同五只羊，特登起咗座庙添噃。




第22课

课文 五羊城嘅传说之二

听完陈老师讲古仔，麦克笑住话：怪唔之得广州噉繁荣啦，原来有五只仙羊喺度保佑住嘅。哎，系喇，陈老师，嗰间庙喺边处嚟呀？
陈老师话畀麦克知，喺惠福路有个五仙观，系一座好古老好靓嘅庙，呢度话系仙人落脚嘅地方?。庙入便有五仙人同五羊嘅塑像，仲有一旧好大嘅红岩石，石头上便有一个一米几长嘅凹痕，啲人话系仙人留落嘅脚指印?。庙后便有一座好出名嘅岭南第一楼同一个五吨重嘅古老大铜钟。另外，喺越秀山，有一座十几米高嘅五羊石像。一只大公羊，个口担住稻穗，岳高个头企喺处，前便有只羊仔跟住羊乸，仲有两只羊仔喺度食草，好生动、好趣致嘅。

知道咗，羊城、穗城嘅来历之后，麦克好高兴，佢同陈老师讲：我一于喽埋班同学去睇吓五仙观同五羊石像先。陈老师，听日礼拜，不如你同我哋一齐去啦？




第23课

课文 古今南大门

讲起广州嘅历史，真系成匹布咁长。广州由开埠至到家吓，计起上嚟都有两千八百年喇。不过，嗰阵时个名唔叫广州叫楚庭，而家越秀山百步梯左近仲有个牌坊，写住古之楚庭添噃。后尾又换过个名，叫做番愚。噉，系几时先至有而家呢个名嘅呢？系公元二二六年。

广州自古嘅对外、贸易就好发达，喺一千三百年前，广州系世界闻名嘅港口停喺珠江上便嘅海船有成四千咁多，有八十万人出出入入做生意，啲船可以由广州一直开到波斯湾！呢条水路就系历史上有名嘅海上丝绸之路喇。古代中国嘅文明同科学，经过广州呢个南大门，传到去南亚、西亚、地中海沿岸各国，嗰

啲国家嘅文化、宗教亦由广州传到入中国。

而家，广州仲系中国嘅南大门，系对外交往嘅重要口岸。喺一九五七年起。每年喺广州举办春秋两届嘅中国出口商品交易会，世界各地嘅客商都嚟交易会倾生意。广州唔单止有发达嘅水路、仲有发达嘅陆路、空运。喺经济贸易方面同国外方便来往。古老嘅广州，越嚟越繁荣，越嚟越青春



第24课

课文 西关讲古之一

旧阵时，广州有只歌仔系噉唱嘅：有钱住荔湾，有势住东山，冇钱冇势住河南。荔湾即系荔湾区。五百年前，荔湾区已经系广州最旺嘅商业喇，做生意嘅有钱佬净系住喺嗰度，唔系民间点会有嗰只歌仔唱呢。

古代嘅荔湾区系广州城西便嘅水乡嚟嘅，所以又叫做西关，家阵时好多人仲兴噉叫嘅、嗰阵时嘅西关，度度都系河涌、水塘，啲人扒船过桥仲多过行路，塘基上便种满晒荔枝。一到荔枝熟，啲人就涌去食荔枝，墟墟冚冚。南越王喺嗰度起咗座好靓嘅王宫，年年都清好多人客喺王宫品尝荔枝。多过行路，塘基上便种满晒荔枝。一到荔枝熟，啲人就涌去食荔枝，墟墟冚冚。南越王喺嗰度起咗座好靓嘅王宫，年年都清好多人客喺王宫品尝荔枝。

啲人客一见到荔枝，都未食入口啫，就一味话：咁靓嘅荔枝！多谢！古代唔少诗人都去过西关，写咗好多诗歌，荔枝湾个名就系噉嚟嘅，荔枝湾成咗个有名嘅风景区、避暑胜地。



第25课

课文 西关讲古之二

后尾唔知点解，整整吓西关冇晒荔枝树，种咗好多莲藕、菱角、马蹄之类嘅蔬菜。虽然冇咗荔枝，但系西关仲系消暑、玩食嘅好去处。日头，游人多数去海角红楼同西郊两个出名嘅游泳场游水；一到晚头黑，人人都租艇仔游涌，一自喺艇仔入便食海鲜、食艇仔粥，一阵倾偈、乘凉。有时啲河涌畀艇仔塞冚晒，扒极都扒唔郁。

噉，西关又点会变成南业中心嘅呢噉，西关又点会变成南业中心嘅呢？呢个同广州嘅地理 环境变化有关系。由于广州原底停海船嘅码头一路路畀泥沙塞住，码头褪到西关南便，离家阵五百年左右，西关成咗国际港口，广州嘅商业中心，特别系对外贸易嘅中心亦转咗去西关。中国政府特登喺珠江边起咗楼宇，专门打理进出口生意同畀西人居住。而家嘅十三行路就系旧底西人喺广州同中国做生意嘅地方。

而家嘅西关，边度仲睇得出古代水乡嘅样嚟呢，见亲都系店铺，食嘅、用嘅、着嘅、玩嘅，乜嘢都有，你想话买乜就有乜，十三行路离珠江边都唔知几远咯，仲有呀，你想话知道乜嘢话系正牌广州话咩，噉你就去听吓西关话啦！





第26课

课文 水陆变迁话广州

喺广州，系人都知

中山五路、北京路系至旺嘅商业区，边个会谂到，六千年前，呢度仲系海嚟嘅呢。广州一带喺远古时期系南海边嘅一个浅水湾，啲水曾经浸到越秀山下便，如果而家你去嗰度掘地掘到五米度，包你揾到好多蚝鼓壳！后尾由于泥沙越积越多，海边一自自退去南便，原来嘅浅水湾变成珠江三角洲大平原，广州就喺三角洲嘅，北便，而家，广州离海已经有百几公里噉远喇。

唔好讲咁远喇，就攞珠江嚟讲啦，古代嘅珠江边度学似而家噉架，好阔架！啲人叫珠江做小海嘅家吓广州人仲习惯将珠江边叫做海皮。过江叫做过海。两千年前，而家嘅中山四路仲喺珠江边嚟嘅，嗰阵时嘅珠江水咸到唔饮得，广州人周处掘井，或者饮白云山流落嚟嘅山水。一千七百年前，珠江仲有一千五百米咁阔，而家唔够二百米，变得真系犀利！

最初嘅广州城入便，有两山两湖；番山，愚山、仙湖、芝兰湖。而家都冇晒喇。流花湖、荔湾湖、东山湖都系后尾人工掘成嘅。一九一八年广州，总面积有七千五百平方公里，人口有六百三十万，系现代化嘅大都市喇。




第27课

课文 游白云山之一

今日系礼拜日，阿伟同埋班同学约好咗要去白云山玩。佢琴日就买定晒啲菲林、饮料同埋食嘅嘢。今朝一早天仲未光就起身，搭车去到麓湖，明仔佢哋早就喺处等紧佢喇。

白云山系广州市最高嘅地方，佢哋已经去过好多次嘞，以前都系行上去嘅，呢匀因为要赶住睇日出，所以决定搭缆车上去。上咗嗰啲红绿绿好似大灯笼噉嘅缆车，唔使两个字就上到去山顶喇。佢哋嚟到晓望阁，个天先至蒙蒙光。阿伟指住山下便话：喂，嗰的一辘辘嘅系乜嘢嚟架？明仔话：使乜心急噃，计我话等一阵日头出嚟咪知啰。

冇几耐，日头喺啲云后便趷咗半个头出嚟。阿伟家吓先至睇清楚，嗰啲一辘辘嘅原来系广州市区嘅高楼大厦啲屋同埋四周围嘅山树，好似镀咗一层金噉，金光灿灿；天上啲云，五光十色。阿伟话：哗，真系靓呀。晨早流流上到嚟，本来谂住嘥气嘅啦，点不知原来噉靓嘅?。喂，阿华，快脆啲嚟同我映番张相啦。




第28课

课文 游白云山之二

佢哋映完相，明仔话：喂，我哋上去摩星岭咧，斗快睇边个第一个上到去。阿华佢哋个个都话好，净系阿伟话：好啰噃，咪整蛊我啦，明知我至肥，行得摩。我先至唔同你哋斗快呀。明仔话：又好，噉咪慢慢行啰，佢哋一班人上到白云山最高嘅摩星岭，只觉得清风阵阵，见到啲白云喺半山腰处飘吓飘吓，半遮半掩住远远嘅花城，珠江好似一条白色嘅腰带，揽住五彩缤纷嘅城市，真系写意呀。

喺摩星岭落嚟之后，佢

哋屈去能仁寺。嗰度左近有个九龙泉，啲泉水喺个龙头处流出嚟。明仔话：呢个就系九龙泉嘞。听讲话啲水饮咗会行好运嘅?。阿伟一听啦啦声就去啰只杯去哔嚟饮，第啲人都唔执输，一人饮咗一杯。虽然唔一定真系会行好运，不过行咗咁耐，出汗出到衫都湿笠笠，饮番杯又清又凉嘅泉水，都唔知几舒服呀。

阿伟佢哋由白云山北便落处满山遍野都系松树，简直就系一片绿色嘅海洋，只要有一阵风吹过，就听到好似海浪噉嘅哗哗声。怪唔之得人哋话呢处系白云松涛啦。虽然天时好热，不过呢处都唔知几阴凉。阿伟佢哋忍唔住一自行一自唱歌，因为呢一日佢哋过得真开心。




第29课
课文 越秀公园

越秀公园系广州最大嘅公园，入便有山有水，日日都有好多人去嗰处玩架。因为明朝嗰阵时有人喺山顶处起咗个观音阁，而家广州老一脱嘅人都仲将嗰处叫成观音山。

喺越秀山顶嘅绿树丛中有一座朱红色嘅镇海楼，系明朝嘅建筑，经已有六百几年嘅历史嘞，嗰栋楼高二十八米，一共有五层，一般人都习惯将佢叫成五层楼。上到楼顶，成个广州市区区都见到晒。而家嗰度系广州博物馆，入便摆住好多文物，睇咗之后就可以知道晒广州由古到今嘅历史嘞。离五层楼冇几远有个好高大嘅五羊石雕，凡系第一次嚟广州嘅人，几乎个个都去嗰处映番张相留念，因为五羊系羊城嘅象征嚟架。

越秀公园入便仲有好高嘅中山纪念碑，系为咗纪念孙中山先生喺广州从事革命活动而起嘅，上便仲刻住佢嘅遗嘱添。

越秀公园入便原本连一个湖都冇嘅，后尾卒之挖咗三个湖出嚟，家吓日日都有好多人喺处艇仔、钓鱼。越秀公园入便仲有体育场、游泳场、电 影院、游乐场，总之你想玩乜就有乜。唔怪之得咁多人中意去嗰处玩啦。




第30课
课文 食在广州之一

喺广州四围行吓，可以见到酒楼、茶居数唔晒咁多街头巷尾仲有好多大排档、小食店，周时都人头涌涌。有人喺处一自叹茶一自打牙较，有人喺处请客倾生意，仲有人喺酒楼摆结婚酒或者生日酒。广州人好似除咗做就系食噉。

俗语都有话，民以食为天，人冇嘢食梗系唔得啦，如果做极都冇啖好食，边个仲有心机去做噃。不过广州人就特别讲究口福，又要食得饱，又要食得好，唔理乜嘢材料，都谂尽方法整出各种花样同味道嚟食，听讲净系鸡一样啫，就整出大概成二百款咁多。不过，因为广州地方比较热，菜式嘅口味一般以清、鲜、滑、爽为主，食起上嚟一啲都唔肥腻。炮制嗰阵时，特别讲究色、香、味、形，啲菜整出嚟，又好睇又好食。

有人讲笑话广州人天上飞嘅除咗飞机

，地下四只脚嘅除咗台凳，乜都食。呢句说话虽然有啲夸奖，不过广东菜啲材料，飞禽走兽，山珍海味，瓜菜蔬果，真系有成千种咁多。连猫狗蛇龟都食埋。喺西关个头，仲有间专门食蛇嘅蛇王满添噃。





第31课
课文 食在广州之二

讲开又讲吖，广州人又唔系吓吓都去酒楼食饭嘅，如果唔系有应酬，佢哋平时多数都喺屋企食饭，整啲餸亦都好普通。之不过广州人食嘢嘅口味就比较叼，如果去街市睇吓啲嘢嘅价钱就知嘅喇，鱼头仲贵过鱼肉，鸡翼、鸡脚仲贵过鸡肶，排骨仲贵过瘦肉。而且广州人食嘢至讲究新鲜，尤其系食鱼，啱啱死咗嘅鱼同游紧水嗰啲，价钱争鬼死咁远;如果死得时间长，直程冇人买添噃。

广州嘅酒楼，特别系食海鲜嘅饭店，多数都喺门口度起啲水池，将啲鱼养三几日，去晒啲呢味。食客嚟到，中意边条就点边条；大厨师即时捞起即时炮制，整出嚟味道梗系又嫩滑又鲜甜啦。

食在广州，除咗话广州多嘢食，仲指广州食嘢方便。好多酒楼晨早就开档，一直到半夜，有啲甚至通宵都有嘢食。总而言之，喺广州，只要你有银纸，食乜嘢都有，只要你中意，几时食都得。



第32课
课文 大排档

所谓大排档，系指嗰啲规模唔大，经济实惠嘅小食店。喺广州，四围都可以见到噉样嘅大排档。

你千祈唔好睇低呢啲大排档，因为佢哋系食在广州嘅一个重要组成部分。好多大排档居然设备简单，之不过好多嘢食，粥、粉、面样样齐全，而且大排档啲嘢一般都比较平，所以好受广州市民嘅欢迎。家阵生活节奏加快咗，好多人都唔煮早餐喇、去大排档食一碗牛腩粉，或者一碟肠粉，再加一碗明火白粥，跟住去上班，真系又快脆又饱。

晏昼放咗工如果返屋企煮饭整餸，嘥时间兼夹嘥精神，好多人去排档整一碟干炒牛河，再加一碗鱼片粥就搞掂架喇。天时冷嗰阵，一个煲仔饭加一碟油菜，又悭时间又悭钱，食完仲可以瞌一瞌先至去上班，不知几方便。

广州人多数都好中意宵夜，所以一到晚黑九点钟度，街边嗰啲大排档就热闹起上嚟喇。天时热，整碗绿豆糖水或者芝麻糊，又消暑又解渴。秋天叫碟炒田螺加支啤酒，一自吮一自饮，叹个零钟头，唔知几梳乎。天冷嗰阵，三五知已，围住熊熊炉火，一煲香肉，几斤生菜，食落又暖肚又有情趣。讲究秋冬进补嘅人，唔使自己嘥时间去慢慢煲架，好多大排档都各种唔同嘅炖品，你中意食乜嘢都得。




第33课
课文 叹早茶之一

约翰同埋玛丽嚟咗广州个零月喇，佢哋同中国学生李明好老朋。礼拜日朝早，李明约佢哋去饮茶，佢哋两个好高兴噉应承佢：“

好呃！”

佢哋三个人出咗校门，嚟到间几骨子嘅茶居，上二楼揾咗个窗口位坐低。一位小姐行埋嚟，好客气噉问：“请问，饮乜嘢茶呀？”
李明问佢：“有冇铁观音呀？小姐话:冇铁观音噃，乌龙就有。李明话噉，就嚟一壶乌龙啦。

饮茶嗰阵，见到有个小姐推住车点心埋嚟，李明随手攞咗几款摆喺台面。约翰问：“你请我哋饮茶啫嘛，使乜攞咁多嘢食啫？李明笑住话：”我哋广州人饮茶，就系一路饮茶，一路食点心，唔使客气噃。玛丽夹咗旧点心嚟食，真系好味，就问李明：呢啲叫做乜嘢呀？跟住佢叫做咸水角。约翰、玛丽都觉得好好食。后尾，李明又攞咗几味甜点心，有连容包、蛋挞、马蹄糕大家食得好开心。





第34课
课文 叹早茶之二

食食吓，约翰见到隔离台有个后生仔，人哋斟茶畀佢嗰阵，佢用两只手指喺茶杯旁边点咗几下，觉得好出奇，就问李明系乜嘢意思。李明话：“呢度仲有段古仔添。听讲清朝有个皇帝嚟到南方查访民情。有一日，佢着住便服，带埋侍卫嚟到茶居。饮茶嗰阵，皇帝溺起茶壶斟茶畀侍卫饮茶嗰阵，皇帝溺起茶壶斟茶畀侍卫饮，侍卫吓到想企起身跪低。皇帝即时制止：“唔得！”佢怕暴露身份，就叫侍卫用两只手指喺台上边轻轻敲几吓，代表两个膝头哥跪落地。由嗰时开始，广州人就用呢个手势嚟多谢人哋斟茶畀佢嘞。讲到呢度，约翰特登斟茶畀玛丽即刻用两只手指喺台上边点咗两吓，一便话：“多谢，多谢！”大家都笑起上嚟。

三个人一路饮茶，一路倾偈，唔经唔觉九点半钟嘞。小姐，唔该埋单。”小姐计好数，开咗张单，李明行去柜台边畀咗钱。叹完早茶，佢高高兴兴噉返到学校。






第35课
课文 话说饮茶

广州人去茶居饮茶，有百几年嘅历史架嘞。市内有好多大大细细嘅茶居。旧阵时，上早班嘅工人，天仲未光就去到茶居，冲一盅茶，要两件点心，啲人叫做一盅两件。饮完早茶，就赶住去开工喇，而家广州嘅茶居越嚟越旺。除咗早茶之外，仲有午茶、夜茶。饮茶嘅人几时都咁多。亲朋相聚，商务洽谈，节假日休闲，都好兴约埋去饮茶。

广州人饮茶，以前一路都系饮红茶嘅。后尾，有啲人饮乌龙茶同埋花茶。前一排好兴饮菊普。即系普洱茶抠埋啲杭菊落去。呢排又兴宫廷嘅盅茶，有啲茶居仲有潮州功夫茶饮添。

喺广州叹茶，冇话冇点心嘅。广州嘅点心全国出晒名，品种多多。咸点心有虾饺、叉烧包、凤爪、肠粉等等；甜点心有莲蓉包、马蹄糕、蛋馓等等。总之，多到你唔知拣乜。点心至出名嘅就系泮溪酒家嘅嘞。讲究色香味，造形精美嘅各款点心，

好似艺术品噉，靓到飞起，你见到都会流口水。唔怪得啲西人去到泮溪，梗系要映番张相先至食。

去茶居饮早茶，仲可以食到各种各样嘅粥。乜嘢及第粥呀，牛肉粥呀，鱼片粥呀、艇仔粥呀，应有尽有。叫一碗滚热辣嘅粥，浸埋啲油炸鬼落去，食起上嚟唔知几和味呀。




第36课
课文 喺广州过年之一

艾莉喺北京读书，佢今年春节唔喺北京过嘞，嚟广州揾嘅中国朋友茵茵。年佢嘅啲嚟年卅晚，茵茵。嗌艾莉去佢屋企食饭。入到屋企，成屋都系人，茵茵嘅哥哥姐姐带埋啲仔女返晒嚟食团年饭，真系热闹，嗰晚有成九个餸，又食鸡，又食鱼。听讲话，九系长长久久，鱼系年年有余噉话?。食完饭，佢哋两个跟埋啲人去教育路行花街。

教育路花市系广州市嘅中心花市，喺入口嗰度有装饰得鬼咁靓嘅牌楼，牌楼两边写住两行大字，茵茵话系对联嚟嘅?，又话过年嗰阵好多人家都兴写番副对联贴吓架，入咗牌楼，见到好逼人，密质质噉，真系爆晒棚。啲细路仔骑喺大人个膊头度。唔知几得啲戚。广播器播住音乐，啲游人同档主大声讲价，好热闹。

马路两边有花架，花架上边摆满金桔，菊花，桃花、水仙花等等，应有尽有，其中以买金桔最多，为因都谂住保佑大吉大利，艾莉最中意玫瑰花同埋芍药啦，佢一样买咗两支，茵茵又买咗一束蟹爪菊同埋两支银柳送畀佢，话合埋一齐先至衬?。嗰晚佢哋行花街行到成一点钟至返屋企。




第37课
课文 喺广州过年之二

大年初一天仲未光，艾莉就畀炮仗声嘈醒，佢唔知几火滚。啊，原来隔离屋播放录咗烧炮仗声嘅音带。九点钟，艾莉去茵茵屋企拜年，茵茵嗰妈妈攞咗啲瓜子、糖果、年糕，马蹄糕出嚟畀佢食，仲封封利是畀佢添。艾莉问茵茵个妈妈：点解过年兴烧炮仗、兴封利是啫？“呢度有段古架。

佢妈妈话，传说年系太古时候一种怪兽，头上生住对角，好恶死，每年年尾都出嚟食人，啲人就谂计仔治佢：点起火，将啲竹丢入火堆入便，年听见劈劈嘞嘞爆裂声，吓到走夹唔唞。第二日朝头早，大家平安无事，于是乎高高兴兴噉互相祝贺，以后就形成过年嘅习俗喇。封利是系图个吉利嘅意思。

年初二下午，佢哋两个出街，沿路见到街上边好多人着住新衫行街，去亲戚朋友度拜年。

初七嗰日，艾莉返北京。喺机场，佢喊起上嚟，唔舍得走，茵茵个妈妈话：今日系人日，人人生日，你要开开心心至系。欢迎你以后再嚟。再见！




第38课
课文 端午节

旧历五月初五系端午节。端午节，古时又称仲夏端午。仲夏，即旧历五月；端，初嘅意思；午，代表中午十一点至一点

呢个时间，又因为午同五同音，所以五月初五就作为端午节喇。

端午节，民间有食粽同埋扒龙船嘅习俗，传说系同纪念中国古代爱国诗人屈原有关。相传两千几年前，中原地区有七个国家，其中秦国最强，楚国最大。秦国成日谂住吞食其它国家。屈原系楚国嘅大夫，佢主张联合各国抵抗秦国，但系楚王反而信啲坏人嘅说话，屈原受到迫害，冇官做，仲畀人赶出京城添。佢嬲到震，写咗好多忧国忧民嘅诗歌。

后尾，佢听讲楚国嘅首都畀秦国攻落，好悲痛，就喺湖南汩罗江跳水自杀。嗰日，系五月初五，嗰时啲人好同情佢，又好敬重佢嘅爱国精神，就争住撑船打捞。而家每逢端午节各地举行扒龙船比赛嘅习俗就系喺嗰阵时传落嚟嘅。后尾仲发展到西人都组织国际队参赛添。

咁点解要食粽呢？当时啲人惊住啲鱼食咗屈原嘅尸体，就将啲糯米放入竹筒度，掉入江度喂鱼，后尾又用树叶包住，用红线绑住，即系而家嘅粽喇。而家啲粽最常见嘅有咸肉粽，豆沙枧水粽。最出名嘅梗系肇庆粽啦。





第39课
课文 出门难之一

广州系中国嘅南大门，又系个沿海开放城市，工商业相当发达，时时都有好多人嚟做生意，仲有好多华侨、港澳同胞嚟广州探亲访友，好多外国游客都要经过广州去内地旅游，所以广州嘅交通几时都咁挤逼，好多人都话出亲门就寸步难行。

如果想悭番啲脚骨力又悭番啲钱。噉就去逼巴士啦。搭巴士至平。上咗车唔理去边度，几毫子一张飞啫。不过搭巴士如果唔啱路就要转车，而且搭车嘅人好多，上落班嗰阵啲巴士真系逼到唔恨，个个都赶时间争住搭车，求其上得车就算架喇，仲打理有冇位坐咁叹世界咩？有时逼到打桩都打唔入，个个都畀人夹到好似沙甸鱼噉，踩亲人哋只脚梗系要讲声对唔住啦，有时畀啲扒手博乱打咗荷包都话唔定添噃。

不过如果怕逼牌价车，可以搭高价车嘅，即系嗰啲小巴或者专线车啰，呢啲车价钱贵啲，大约个半到三蚊咁上下，不过到咗上落班嘅高峰时间，同嗰啲牌价车咪差唔多一样咁逼。

至方便至舒服嘅当然系打的啦，唔使逼，而且想去边度都得，但系价钱就梗系至贵架喇，睇咪表畀钱，一上车五六文，撞啱塞车嗰阵时，系噉坐喺处睇住跳表，真系发掹都冇符。




第40课
课文 出门难之二

广州冇乜人有私家车，佢哋多数都靠踩单车，因为踩单车一嚟唔使逼巴士咁辛苦，二嚟比较灵活，避免咗塞车嘅烦恼。喺广州，平均每两个人就有一架单车，冚唪冷有成二百五十万架咁多，所以有人话单车直程就系马路大王，唔信你喺返工放工嘅时间去海珠桥睇吓，嗰啲单车密

质质噉冚住晒成个桥面，不知几犀利。

之踩单车有踩单车嘅难处，嘥脚骨力唔使讲啦，仲唔去得太远嘅哋方，唔系嘅话呢，踩到朔晒气到去唔到呀。仲有就系遇啱返风落雨踩单车就辛苦之极，所以呢啲时候好多人宁愿去逼巴士都唔踩单车喇。

而家越嚟多人买摩托车嚟骑，噉当然好过踩单车啦，又快脆又唔使嘥脚骨力不过养一部摩托车又鬼咁麻烦，要有好多嘢跟手尾架嘛，买电油啦，换电池啦，真系讲之不尽架，而且同啲汽车行埋一齐?，好容易出事架，唉，总之就系出门难啦。



第41课
课文 广州嘅交通

广州市净系市区而家有成四百万人，总共有二十六万部汽车，十六万部摩托车，二百五十万部单车，而每日出入广州嘅外地汽车有八万部咁多。车多本嚟系好事，之不过广州嘅马路，尤其系市区里头，多数都鬼咁窄，所以广州嘅交通时时都好挤逼。市区嘅巴士时速仲唔到十公里，仲慢过啲人踩单车。

每日上落班嘅高峰时间，好多地方啲车直程好似蚁躝噉，如果撞啱塞车，啲车排起长龙，简直郁不得其正。有啲心急嘅司机，就唔理咁多交通规则，一有机会就扒头打尖，横冲直撞，搞到乱晒大龙。车多路窄，交通事故事有乜法子唔多吖。

呢几年为咗解决广州嘅交通问题，政府都算想咗好多度桥喇。首先系喺珠江处起多咗两条桥，及埋以前嗰两条，家吓一共有四条桥，噉就基本上解决咗河北同河南嘅来往问题，过海大都唔使搭渡轮嘞，旧阵时嗰啲过海渡轮而家少咗好多喇。

喺黄沙嗰处仲起咗一条海底隧道添噃。第二就系想办法扩阔啲马路，冇法子扩阔马路就起高架路，仲喺啲樽颈地方起咗好多立体交叉同行人天桥，噉就唔至于有车冇路行啦嘛。为咗彻底解决交通问题，政府已经决定起一条地下铁路添噃。




第42课
课文 古玩一条街之一

问起源胜西街上嚟，一万个广州人入便未必有一个人识，之但系唔少嘅香港人，澳门人，台湾人，仲有西人添，都识呢条街，佢哋嚟呢度买啲嘢，唔买嘢嘅都想嚟见识吓。

源胜西街喺西关，街口写住玉器陶瓷工艺街。呢条街弯弯曲曲，有二三百米度、摊档铺位密密质质，摆卖嘅嘢会令到你大开眼界！除咗古陶瓷、古玉器之外，仲有古钱、古字画、古书、鸦片烟筒、清朝嘅衫，甚至乎连旧时扎脚女人嘅三寸花鞋、古代官帽上便嗰粒的都有。

嚟呢条街嘅有游客，又有收藏家，多数系古玩商。有啲人拎住个皮喼仔或者摵住个袋，呢度贡吓嗰度睇吓，一系踎喺度同货主细细声倾，一系同老板闩埋度门密斟。嗰啲唔起眼嘅皮喼、手袋入便，有鬼咁值钱嘅好嘢都未定哩！

第43课
课文 古玩一条街之二

有个老伯睇啱咗一只彩碟，货主话系正宗明朝货，老伯嘅衫袋度拎出个放大镜,左睇右睇,想话睇真啲系正嘢抑或系流嘢。梗系啦，一唔觉意买咗流嘢，真系蚀晒大底架！

有两个青年仔踎喺一堆生锈嘅古钱前便搏命咁拣，货主话呢啲全部系宋朝古钱，佢仲有清朝各个皇帝时期嘅古钱，整成一套套卖，佢话：“有人睇啱我就卖，有得赚就算，唔争在赚几多啦。有一个老伯摆出只元代大盘，开价一百文，卒之五十蚊卖咗。一个细细嘅挂瓶，开价两千蚊，围住睇嘅人吓到窒晒。

后尾有个熟行嘅人行过嚟睇咗吓，话嗰个挂瓶系仿造嘅，不过讲开又讲啦，好多仿造嘅工艺品，仿得嚟都几似嘅噃。

除咗街两便嘅摊档之外，仲有一间间嘅固定铺头。有好几间都系卖紫沙壶嘅，货架上便摆满晒各种造型、各种色彩花纹嘅紫沙壶。货主介绍，紫沙壶已经有千几年历史喇，攞嚟冲茶又得，装酒又得，味道零舍香醇；攞紫沙壶冲嘅茶，十日都唔会宿嘅?！




第44课
课文 兴旺发达嘅专业街

广州自古商业就好发达，而家更之系添，几乎条条街巷都有铺头、摊档，大嘅有十层楼咁高嘅百货大厦，细嘅有一米阔窄嘅铺位。朝头早八九点钟度就开档，至到晚头黑九点钟、十点钟先至收档。好值得讲吓嘅系近年嚟兴起嘅专业街，同一类嘅嘢放埋一条街嚟卖，呢啲噉嘅街喺广州至少有三十几条！

有人话：冇去睇过灯光夜市，就唔算嚟过广州。就系灯光夜市，广州就有十零个。每日天未黑齐，档主就嗱嗱声搭棚较灯，天一黑，时装、百货、日用品、食品，好多嘢卖。最大嘅夜市系西湖夜市，专经营中高档时装，国内外最新时款喺呢度任拣唔嬲，啲人叫嗰度做羊城夜明珠。

除咗灯光夜市之外，仲有其它嘅专业街。清平街市场系全市最大嘅嘢味街，天上便飞嘅、地上便爬嘅、水入便游嘅，应有尽有。字画街、玉器街、鲜花街、科技街、水族街、女士用品街、服装配料街，……名堂多多。

千祈唔好漏咗西濠嘅汤粉抑或几百蚊嘅宴席，都令到食客个个食过返寻味。有啲菜馆仲开通宵添，正一系广州嘅不夜天！



第45课
课文 倾生意之一

冈崎先生系日本茶叶商，同中国做生意经已十几年嘞。每年春秋两届嘅广交会，佢实参加。呢次佢亦唔例外，一早就到咗广州等。

交易会一开幕，佢就熟门熟路噉去揾佢嘅老朋老周，周先生原来系福建茶叶出口公司谈判代表。点知呢次出嚟接待佢嘅，唔系老周，而系一位后生仔李先生。佢话老周经已离职下海?。乜嘢叫做下海呀？冈崎用佢唔咸唔淡嘅广州话问嗰位后

生仔。

原来下海即系辞去公职而去搞生意噉解。李先生自己喺美国读咗个MBA,趁住国内转向市场经济嘅时机，带埋老婆仔女返番嚟中国发展。冈崎一听，即刻感到中国开放政策好有吸引力。

冈崎同李先生喺洽谈室里面坐低，佢一面睇样品，一面品茶。佢知道，近呢几年嚟，日本人好兴饮乌龙茶。作为茶叶商，佢特别睇中嗰只FL115嘅小包装铁观音，于是佢就向李先生打听报价。

FOB一箱六十五美金啦。

噉CLF横滨到岸价呢？哗，成七十二美金呀？



第46课
课文 倾生意之二

冈崎眯埋对眼话，呢次嘅报价高过旧年好多噃，唔系呃。李先生即刻回应，嗱，第一，呢个品号嘅铁观音系公司嘅新产品，第二，呢排茶叶嘅成本起咗好多，你都知嘅喇。

冈崎喺张沙发度坐直个身，向李先生解释话，当前日本国内经济唔景气，咁高嘅价钱确实好难推销。

噉，你畀我个还盘好唔好？

CIF横滨一箱至多系六十八美金。

还盘太过低，我哋好难接受嘅噃

我哋系老主顾，应该优惠我哋多啲先至啱架。

我睇双方都坚持自己嘅价格，好难倾落去架，不如都让吓步嘞。

你话点让法？

各让一半，得唔得？

噉，即系一箱七十美金。仲系高啲。够晒优惠架嘞，唔该问吓，你想订几多？

一千箱。

如果订二千箱嘅话，六十九美金一箱，点？

好啦，我哋就接受你呢个条件，CIF横滨六十九美金。过一两日我再返嚟确认。好嘅，今日就系噉先。




第47课
课文 广交会

广州市近住流花湖，有一座宏伟嘅现代化建筑，中国出口商品交易会九个金色大字镶咗喺正面宽阔嘅玻璃幕墙上，显得特别抢眼。每年春秋两季都喺嗰度举办大规模嘅交易会。从一九五七年开始，经已系第七十几届嘞。

呢个交易会系中国出口商品嘅展销场所，嚟自全国各地嘅商品超过五万个品种。同中国做生意嘅外商，唔使行匀中国就有机会喺嗰度落单成交。成交总额时不时占咗中国外贸出口总额嘅五分之一，真系唔系嘢少。春交会同秋交会分别喺每年嘅四月同埋十月中下旬举办。

到时喺成两千几个洽谈室里头，主客双方紧张噉倾掂咗就写意向书，然后跟进直至签订合同。倾唔掂，再倾过。再唔掂，各让一步睇睇。实在唔掂，得个倾字亦唔紧要。俗语有讲，生意不成友谊在吖嘛。

中国喺对外开放嘅政策中，唔单止要出口，亦要进口。每届嚟嘅客商亦可以提出佢哋想卖嘅嘢嘅清单。噉样，进口出口嘅交易都搞得好活跃。仲有，以往啲客商多数嚟自港澳、东南亚、欧美同埋日本，而家非洲、拉丁美洲嘅客商都多咗好多。今后，中国

出口商品交易会仲要过渡到博览会?。



第48课
课文 广州人依然周身证之一

眨下眼，我哋高中毕业已经五六年喇，有一日朝早，我约埋强仔、波仔几个中学同学去茶楼饮茶。老同学喺埋一齐，梗系有乜讲乜啦。

强仔讲，佢做推销员，四围噉走走趯趯[dek3]，工作好频扑。钱系揾到啲，但仲系冇乜发展，谂住搏一搏，第日搞番啲啱自己做嘅嘢，所以而家喺夜校读紧室内装修，又做番学生。

我哋都赞强仔有谂头，既识得赚钱，又舍得花时间读书。强仔仲话，喺夜校嗰度，周不时可以睇到啲大学毕业生，高中生、初中生坐埋一间课室，一齐读一门课程架。

波仔话，而家社会竞争咁激烈，唔学啲嘢，就好难喺社会企得住脚。而家啲人去见工，就好中意攞出各种证书，向啲招聘单位推销自己。佢话佢一家之中就有几个人读紧夜校。日日食完晚饭，唔系呢个擒擒青走，就系嗰个急急脚行。

佢大佬想做电工，但系要有上岗证先至做到呢份工，噉佢就去读电工考证班，而佢阿嫂读嘅系会计考证班，做会计若果冇会计证嘅话、连喺银行支票上便抌自己图章嘅资格都冇架。




第49课
课文 广州人依然周身证之二

波仔仲话，佢自己读完大学之后喺公司做文员，而家都一样返夜校读电脑班。佢已经搏到几张沙纸架喇。波仔仲讲到佢嘅拖友阿芳。佢哋两个系喺夜校识嘅。阿芳读完裁剪班，而家又走去读时装设计班。佢哋都觉得呢啲学习教学讲求实效，学得到嘢。

我哋仲倾起当时班里便英文最叻嘅文仔。文仔研究所嗰度工作好忙，之仲系抓紧时间读托福考试班。

最后，大家都笑住讲，而家边个冇几张学员证、结业证、毕业证、资格证吖？家阵市场繁荣，广州人嘅生活改善咗好多，旧时吓吓都要用到嘅布票、糖票、肉票、粮票嗰啲购物票证，卒之都冚唪冷取消晒。但系摆脱咗票证嘅广州人，又收埋唔少新证。

真系广州人几时都离唔开证嘅。唔怪之得人人都话，广州人揼[dam2]咗各种购物票证，之而家依然周身证。





第50课
课文 广州嘅大学

广州嘅中学生喺成个高中阶段，都好勤力噉读书，佢哋都好恨能够入到大学深造。每年7月，参加高考嘅学生一连三日挥汗应试，之但系能唔能够入围，噉就要拗过手瓜至知。

能够考上大学嘅学生，一般系读全日制大学。大多数高校，以培养本科生为主，学制都系四年。医科类，学制系五年或者六年。唔少高校招收攻读硕士、博士学位嘅研究生。普通高校嘅专科班同专科大学，培养专科生，学制系两年。

广州仲有办学形式多样嘅成人高等教育、函授教育、夜大学、广播

电视大学、职工大学、业余大学、仲有颁发单科合格证书嘅高等教育自学考试添。

广州系华南嘅教育中心，一共有廿五间高等院校，每年培养大学毕业生二万几人。喺呢啲大学当中，属全国重点嘅有中山大学、暨南大学、华南理工大学，中山医科大学、华南师范大学、华南农业大学等。

高校最集中嘅系五山一石牌呢笪地区，呢度占地虽然只有八平方公里，但系啲大学加加埋埋就有七间咁多。

而家，广州有八间大学开办咗对外汉语教学班，招收学习汉语（或粤语）嘅外国留学生。




第51课
课文 游山玩水之一

庄臣由美国纽约嚟广州学粤语，佢喺纽约住喺市区嘅住宅处，嚟到广州又住喺市区嘅住宅区，觉得鬼死咁闷。佢早就听讲肇庆嘅山水好靓，所以佢成日都心思思谂住揾个机会去嗰度行吓。上个礼拜去肇庆玩。

庄臣嚟肇庆嘅七星岩，见到一个好大嘅湖，上便戙[dung6](竖着)起七座石山，佢睇咗张简介，先至知道原来呢七座石山仲有一段古嘅。只古仔话以前个天畀一个叫“共工”嘅人撞崩咗，有个叫“女娲”嘅炼咗七粒宝石，叫七个神仙无论如何要喺天光之前去补好个天。

点不知嗰七个神仙行行吓，撞啱打大风，佢哋失失魂噉，荡失咗路，差唔多天光嗰阵，佢哋唔理三七二十一，将嗰七粒宝石喺天上便，揾咗落嚟，啱啱跌喺西江边，于是乎就变成咗而家嘅七星岩嘞。庄臣明知古仔系啲人作出嚟嘅，不过觉得都几趣致。




第52课
课文 游山玩水之二

嗰七座石山座座都唔同样嘅，有座好似撑住个天嘅大石柱噉，有座好似打开嘅屏风嘅，有座好似伏喺地下嘅蠄蟝[kam4 keoi4-2](蟾蜍)噉，有座好似神仙伸开嘅巴掌噉。

庄臣嚟到最大嗰座石室岩，嗰度有个山窿，原来入便仲有条地下河添噃，佢跟埋人哋搭条艇仔入去，见到入便点住红红绿绿好多灯，映照住啲千奇百怪嘅石钟乳，有啲似条龙，有啲似只马，有啲似仙女下凡，有啲似武士打斗。慢慢睇落去真系好似睇电影噉。

庄臣喺石室岩出嚟，见到石壁上便刻住好多字，佢唔识得几多汉字，啲字写得又鬼咁缭繑[liu5 kiu5](潦草)，不过谂怕都系赞呢度啲风光靓嘅说话嚟嘅啦。佢一直喺风光如画嘅山水之间行，一直谂，喺石屎森林处闷咗咁耐，出嚟自然风光嘅地方行吓，啲感觉真系零舍唔同。




第53课
课文 广东嘅名山大村之一

喺广东北便近住韶关有座丹霞山。为因嗰度山系经过成千上万年形成嘅红砂岩，红到好似天上嘅彩霞噉，所以叫做丹霞山。丹霞山虽然唔系十分高，不过有啲地方好企架，要扯住条铁链先至上得去架。

喺至高嗰处有座观