闽南童谣

◆Do Re Mi

Do Re Mi，大頭的拈田蛜，

田蛜天頂高，大頭的賣肉圓，

肉圓苦苦不好食，大頭的賣柴履，

柴履不好穿，大頭的真徼倖。

◆一二三四

一二三四，

倪仔人褪裼無事情，

土地公伯仔來保庇。

◆一放雞

一放雞，二放鴨，三分開，四相貼，

五搭胸，六拍手，七紡紗，八摸鼻，

九咬耳，十摸腳，十一摸土腳，十二攏總捎。

◆一的炒米芳

一的炒米芳，二的炒韭菜，三的沖沖滾，

四的少米粉，五的五將軍，六的攬子孫，

七的七蝦米，八的縖肚綰，九的倒在蠕，

十的倚起來看。

打你千，打你萬，打你一千過五萬，

老鼠仔欲啁就緊啁，不啁給你打到啁。

◆一個作穡的

一個作穡的，真古錐，

驚熱蒙棕簑，種籽敥歸堆，

種蕃薯，收當歸，插甘蔗，

收鑼鎚，作三年穡，

好額到會得落樓梯。

◆一個緣投兄

一個緣投仔兄，予婦打生驚，

正月初一日，透早去拜正，

褲穿長短腳，上路坦橫行，

人看真好笑，假愚假無聽，

丈姆看一見，氣到不出聲，

食蚶無剝殼，食肉揀硬背，

酒做一下醉，房間四界拋，

好是丈姆厝，無得食打背。

◆一陣鳥仔白溜溜

一陣鳥仔白溜溜，一條大路透福州，福州諸婦敖打球，打起有花共有柳，讓叔仔敖激酒，激去真正厚，

豬哥奔仔敖獵鱟，獵去一個復一個，老鼠緞仔敖擘蝦，擘去一尾復一尾，桌嬸仔敖炊粿：炊去一盛復一盛，遇著箭仔亂使鑽，愛食不敢說，

街頭走到巷仔尾，假無意，假點火，一手抓籠盛，一手偷提粿，

一塊提在食，一塊揜於大盤尾，

燒一下臭焦合著火，

大家笑到歪嘴靦。

◆人插花

人插花，伊插草；

人抱嬰，伊抱狗；

人未嫁，伊先走；

人坐轎，伊坐畚斗；

人睏紅眠床，伊睏屎斛仔口。◆十二生肖

一鼠做頭名，二牛駛犁兄，

三虎爬山崎，四兔遊京城，

五龍皇帝命，六蛇予人驚，

七馬跑兵營，八羊食草嶺，

九猴爬樹頭，十雞啼三聲，

十一狗顧門埕，十二豬真好命。

◆土地公

土地公，土地婆，

許你蟶，許你蚵，到時攏總無。

◆土地婆

土地婆，土地伯，恬恬聽我說，說到今年五十八，好花來著枝，好子來出世，亂彈布袋戲，

紅龜粿三百二，閹雞五斤四。◆子呀子

子呀子，彼時娶恁娘，無眼床，睏踏枋，無棉被，蓋腰裙，

無枕頭，睏草縕，無柴梳，

五爪掄，無蝨篦，墨賊船，

無鏡，照水痕，無茶油，抹清潘。◆天烏烏（一）

天烏烏，欲落雨，舉鋤頭，清水路，清著一尾鯽仔魚欲娶婦，龜擔燈，鱉打鼓，田蛜舉旗叫艱苦，

毛蟹擔燈雙目吐，

水蛙扛轎大腹肚，

一碗圓仔湯予你補。

◆天烏烏（二）

天烏烏，欲落雨，人客滿四界，

宰雞雞仔細，宰鴨惡剝離，

買魚天做烏，買肉人禁屠，

買豆菜水裡捊，買豆腐爛糊糊。

◆天烏烏（三）

天烏烏，不落雨，蕃藷一袋二百五，討海人真艱苦，船仔停到日半晡，欲去又烏影，不去又吊鼎，

阿兄講不去，阿嫂訶得行，

大風大水來打拚，掠著一尾三斑魚，扛到門口呈，阿兄講欲賣，

阿嫂講欲食，蕃藷簽無地糴，

魚仔一大碗，捧著繞饒仔食。

◆月光光

目光光，秀才郎，騎白馬，過南塘，南塘未得過，掠貓仔來接貨，

接未著，舉竹篙，撞厲鷂，

厲鷂跋落田，嫁酒瓶，酒瓶欲貯酒，嫁掃帚，掃帚欲掃地，嫁予賣雜細，賣雜細欲搖鈴鐺，嫁覡公，

覡公欲讀疏，嫁破布，破布欲補衫，嫁牛擔，牛擔欲犁田，嫁酒瓶，

酒瓶走入孔，萬汝仔無頭鬃。

◆木蝨

木蝨欲嫁虼蚤翁，欲掠蚊仔做媒人，蝨母搖手訶不當，虼蚤不是妥當人，牛蜱大隻厚重，嫁伊鑱會親像人。◆水蛙仔子

水蛙仔子，出世肚大大，

嘴闊闊，田中央，起厝滯，

水蛙仔子，無人教，自然會唱歌。◆火金蛄（一）

火金蛄，來食茶，燒燒，

配芎蕉，茶冷冷，配龍眼，

龍眼會花，匏仔換冬瓜，

冬瓜好煮湯，匏仔換粗糠，

粗糠欲起火，九嬸婆仔敖炊粿，

炊到臭焦兼著火。

◆火金蛄（二）

火金蛄，來食茶，茶燒燒，

配芎蕉，芎蕉冷冷，配龍眼，

龍眼蛀核，來食林菝仔核，

林菝仔核無籽，控你的臭頭疕。

◆冬粉湯

冬粉湯，米粉炒，

芋粿湯，食到飽。

◆打鐵哥

打鐵哥，應銅鑼，丈母厝，好逸陶，

一哥交、二哥留，請恁三姊仔來梳頭，

梳也光，篦也光，

早早落柑園，柑國柑仔紅熾熾，

頂街下街人打鐵，打鐵響，

街人媳婦也艱難，也欲煮飯食，

也欲擔水洗灶額，也欲掘土去糊壁，

煩惱天未光，煩惱鴨無卵，

煩惱小姑欲嫁無嫁妝，煩惱小叔欲取無眠床。

◆正月正

正月正，請子婿入大廳。

二月二，宰豬公謝土地。

三月三，桃仔李仔稱頭擔。

四月四，桃仔來李仔去。

五月五，龍船鼓水裡渡。

六月六，踏水車拍碌碡。

七月七，龍眼烏石榴必。

八月八，牽豆藤挽豆莢。

九月九，風吃滿天哮。

十月十，冬瓜糖霜落錢盒。

十一月，人焚火。

十二月，火炊粿。

◆永呀永

永呀永，肚臍發龍眼，

欲食各自揀，不食囥桌頂。

◆白翎鷥（一）

白翎鷥，擔畚箕，

擔到溪仔墘，跋一倒，

擷著一隻鴨母。

◆白翎鷥（二）

白翎鷥，擔畚箕，

擔到溪仔墘，跋一倒擷著一仙錢，買大餅，分大姨，

大姨嫌無餘，呼雞呼狗來咒詛，

咒詛無，投姆婆，

姆婆去做客，投大伯，大伯去賣龜，投姊夫，姊夫去賣紙，